حمة العير مات... طاح مالسلوم في الشانطي جاء على راسو...
زبنطوط و المولدي سمعوا الخبر في القهوة خلاو طرح النوفي و مشاو للجنازة... كيف دخلوا للدشرة، جابو ثنية دار سكينة، يلقاو حضبة متاع نساء متلمين و يوتوتوا:
هيا قربوا جاي، دليلة مرت العير كلمتني و قتلي هاذي الأسوام:
دينار و لحمة: عياط و نواح
10 آلاف و صينية كسكسي: نديب و تولويل
كتف علوش: نديب لوين يطلع الدم و تقطيع دبش
و نتوما دليلكم ملك...
محرزية قتلهم:
- أنا مازلت كيف دبرت كتف علوش في ميتة فضيلة مرت البرني، خدودي مشاو بالنديب، ماذابيا على دينار و لحمة، نصب لايت في تاليفوني و ناكل هبرة و يزي...
أما زمردة بنت السملالي قلتلهم:
- أنا الحق، عندي شهر ما ذقتش اللحم، نشم فيه شمان كيف نتعدى من عند حمد الجزار، تو نعمل جهدي في النديب و نقطع جرودي...
فضيلة بنت جار الله كانت أخبث مالكل، تلفتتلهم و قالت:
- أنا و الله ليومة باخلة على العشاء و ما عينش في الكوجينة، تو نندبهم و نقول فيها وووه، و نروح بعشرة أليفات و صينية كسكسي عشا الصغار... التيجاني راجلي بايت البرة الليلية، في السفر...
كل وحدة منهم لفت سفساريها و مشات تجري لدار الميت.. دقيقة من زمان، ثار العياط و التولويل...
زبنطوط و المولدي واحد شدتو الضحكة و لاخر يبكي، كيف ما ديمقريطس و هرقليطس كيف كانوا يحوسو في كياسات أثينا و يشوفوا وجايع الناس: واحد يضحك و لاخر يبكي الحال... تفاهموا باش يكملوا العشية في البحر يبشطروا بيدون لاقمي، يكميو حفنة تكروري ... في الثنية، هوما يبعدو و صوت العياط يخف... حمة العير كان صاحبهم، وجوه العباد هايمة، فما شكون اللي متحسر على فراقو و شكون اللي ما علابالوش... برد... ريح... زيتون ضربو الشيب بعد ما غدرتو الصابة... ناس هايمة، تكحّل عالخبز و الدفا و ترقد تتمنى في عنبة تفيق متخمرة بريحة الشتا... المفاصل كاسدة كاسحة، و القلب واحل في مرمتو... دفينة، كفن معري و الجنازة لابدة في سكاتها، الميت يفرفط مالسقعة لا شكون يتفكرو لا شكون يبكي عليه... و من ورا حيوط الجبّانة، عزوزة تنوح بكاها يطير الحجل... أم حمة العير...
 |
| هرقليطس باش يبكي |
 |
| ديمقريطس يضحك |
Aucun commentaire:
Enregistrer un commentaire