بلق بلق بلق بلق... زبنطوط تحت الخروبة يجبد فيها على دليلة و هي قدام دارهم خرجت تكنس في الفيراندا... بعد ما فرغ، تلفت لكلبو " أرنوب " و صفرلو باش يجي بحذاه،كيف غلبو النوم، حط راسو و تعدى في الطويل...
قام مفجوع بصوت قوي طرشقلو وذنيه، تلفت يمين يسار، يشوف في ضو أحمر جهرلو عينيه... كريطة قد السخطة عاملة مظلة و بكلها تشعل... هبطوا منها زوز خلايق وجوهها مقلبة... قربوا من زبنطوط و بداو يتكرموا بكلام ما يشبهش للرومي... تلفت زبنطوط يلقى " أرنوب " يحكي معاهم، ما فهم شي... شوية أخرى، بداو الثلاثة يحكيو بالعربي... " أرنوب " تلفت لزبنطوط و قلو:
- هيا أفرحلنا بالضيوف
زبنطوط تقولش عليه عامل أربعة كوديا و رطل تكروري:
- يعطيك أخذة يا " أرنوب "، من وقتاش تنطق؟
واحد مالخلايق قرب من زبنطوط و تكلم:
- جينا لهوني نفركسوا عالعجايب و الغرايب، ما نسيبوك كان ما تحكيلنا غريبة صارت...
زبنطوط:
- ملا شنعة... مسيبين في بر الغرايب في السموات السبعة و جايين هوني للحفرة هاذي تفركسوا عالعجايب ؟
أرنوب:
- بلع فمك، ماهو من كثر العار اللي عملتوه، شي ينطق، ما تشوفش فيا أنا ؟ هيا أحكيلهم حكاية خلينا نفضوا هالوحلة الكلبة متاع وذني...
زبنطوط ما هو فاهم شي تلعطلو الدوزة من كلام " أرنوب "، وخر لتالي، إتكى عالخروبة و خزر للزوز خلايق و قال:
باش نحكيلكم على غريبة ضربتلي مخي بالتريسيتي، حكاية أعجب من عصا موسى و تفاحة آدم و تجلطيم القذافي ... ماهو تسمعوا بيه الحنش اللي تلهوث بحواء و وسوس لآدم باش ينحي التفاحة ( و في رواية أخرى الكمثرى ) و ياكلها؟
الزوز خلايق:
- إيه، قريناها و احنا صغار في القصص المصورة اللي تحكي على الكائنات الفضائية...
أرنوب:
- حتى أنا سمعت بيها...
تونس كيف حواء، قالولها شد جنتك و عيش غادي مع أحبابك، الخميسي و الدوعاجي و بوعبانة، ياخي صار اللي صار... نهار شتا، ولادها تلموا قدام دار الذيب و قالولو ديغاج... أرنوب، فسر لأصحابنا الخلايق آش معناها ديغاج.
أرنوب تلفت للزوز خلايق و قلهم:
-ديغاج يعني " شِرْ "، كيف ما يقولولي هل المناظر المقلبة اللي ساكنين عالخليقة كيف ننبح على جد والدين بوهم الكلب...
زبنطوط عينيه محلولة كيف بوتليس ماهوش مصدق اللي داير بيه... تلفت للخلايق و كمل حديثو:
- الحنش اللي كان حاضر في القصبة 2، دار بالمعتصمين و و وسوسلهم باش الشعب ياكل من شجرة الإنتخابات... المشكلة فاش، أنو الشعب تشعبط بيديه و ساقيه للشجرة و ما نحاش كان كعبة بركة... الحاصل، في بلاصة الذنب ركب ذنوب... و كيف ما قال عشيري المولدي المفندس، اللي يجيبها لزكو، لا تربح دين والديه و لا ترحملو عظم... تعرف آش صارلو من بعد، مشى في بالو باش يلقى الجنة ياخي تسيبيت عليه الفيران من كل شيرة و البرميل اللي كان فيه نقبة واحدة صبح كيف غربال حناتي... آش يسد و آش يندب... ماهو قلنالو نحي الكازي مالعروق مالضربة لولا و ريقل السقف متاعك لا تغرقلك الدار...
ماكلة التفاح ما تجيبش الجنة يا كبدي، أحرث أرضك بمحراث بوقلبة قبل ما تخمم تزرع...
الزوز خلايق طبسوا على زبنطوط و باسوه منا و منا و ركبوا عالكريطة العجيبة متاعهم و ما بقى كان لعجاج... بعد ما روحوا و طفا الضو، و بعد ما زبنطوط بلع ريقو و عطا لروحو زوز كفوف باش يفيق، تلفت لأرنوب و قلو:
- يا أرنوب يعطيك عزا، من وقتاش تنطق يا كلب ؟
أرنوب:
- هب هب هب... هب... هب هب...
Aucun commentaire:
Enregistrer un commentaire