ليلة صيف، زبنطوط في البراري يصطاد في أرنب يعدي بيه دبوسة الكوديا... شق على هفهوف يتبع في الجرة، و إذا بيه يسمع في صوت و ترنيمات... بقى يتبع في الحس لوين وصل يلقى رجال لابسين الأبيض دايرين على كبارة نار و يتمتمو في كلام موش مفهوم...
زبنطوط:
- وليمة ولا شنوة ؟
واحد مالجماعة:
- حلقة ذكر، نتعبدو لربي و ندعيو.
زبنطوط، يجرش في كرارزو:
- و دعاكم مستجاب مالضربة لولا ولا لازم يتعدى على بيرو الملايكة ياخو الموافقة قبل ؟
تلفتلو راجل شيوبة، خزر لكرارز زبنطوط المتدلدلة، تنخم ثلاث مرات و قلو:
- دعائنا يتعدى طول لربي، من غير حتى اجراءات معقدة... ديجا الملايكة يعطيولنا تصحاحة متاع موافقة من غير تكسير كرايم...
زبنطوط ما تقبلش الحكاية، خزر للشيوبة، ضحك و قلو:
يعني نتوما نقابة روحانيين ؟
الشيوبة بدا يتململ، رمى السبحة، شد لحيتو، عينيه ديمة مرشوقة على كرارز زبنطوط، تلفتلو و قال:
- تنجم تقول...
زبنطوط:
- و ما تتكرزوش من " امشي و ايجا " و " أرجع ليلة القدر الجاية " و " خلي لرمضان و لا للمولد " و مالبيرو متاع الملايكة تتعدى لمكاتب متاع السماوات السبعة و و و... لتو تعانيو في بيروقراطية السماء راكم !
الشيوبة سيب اللحية، شد كرارزو، خرج صابونة زطلة، نحى سطر، فتل ليه و لزبنطوط، جبد كميتين، تنهد و قال:
- محكوم علينا بالتلحيس يا زبنطوط، كان ما نعملوش هكا مشينا فيها بازقة... العمل النقابي الروحاني ماهوش حق دستوري في الشريعة، هاك تشوف فينا نخدمو في السرية ديجا...
زبنطوط بدا يشيخ، كمل السيقارو و قرب مالشيوبة و قلو:
- يا ولدي سيب عليك من هالرويق، لا سرية لا شريعة لا راس لمبوط، افتل اكمل و إجبد، توا الملايكة تدوخ معاك و تضربها الشيخة تعديلكم رابور مضروب بالسفود و تنظفلكم الدوسيات متاعكم... إسأل مجرب...
الشيوبة عينيه تحلت، تبسم بالعريض، شد زبنطوط من كرارزو و قلو:
- هاك طلعت ماضي يا زبنطوط ! يا خويا ما دامك تعرف، بربي زيد نورنا، توا نهارة القيامة يطيح بالإثنين ولا بالخميس ؟
زبنطوط هز صابونة الزطلة، ربرب ثلاثة مرات، حك كرارزو و مشى...
Aucun commentaire:
Enregistrer un commentaire